Служба двумстам двадцати двум мученикам пострадавшим в Китае при восстании "боксеров"(ихэтуаней) в 1900 году

Сщмч. Митрофан Пекинский

/p>

НА ВЕЛИЦЕЙ ВЕЧЕРНИ

Блажен муж, 1-й антифон. На Господи, воззвах стихиры мучеником на 8, глас 6.

О дивный полче страстотерпец Христовых, от соплеменных обезумевших убиенных! О мученицы два сте два десят и два, за веру православную живот свой положившии в царстве Китайстем безкрайнем, древнею лжемудростию язычестей хвалящемся! Кто возможет прославити страдания ваша, отче Митрофане богомудре и чада твоя духовныя, мужие и жены, старцы с юными и младенец множество! Приидите, станите с нами и вдохновите ны восхвалити ваше торжество.

О малое стадо, емуже Отец Небесный благоволи дати Царство! Како не дивимся, зряще вы Китайстия прозябения, обретшия многоценный бисер Православия в земле язычестей, идеже вера Христова вмале от латин и ученик Лютеровых проповедана бе и правнуцы славных пленник, от града Албазина древле исшедших, пастырями миссии Российстей просвещаемии, веру отеческую храняху и приходящих к ним сею просвещаху.

Глас пророка Исаии услышим, вернии, взывающа: Се, сии издалеча приидут от земли Синим. Ныне проречение сие исполнися, ныне чада Божия, в земли дальней Синим явльшаяся, к Агнцу, Исаией проповеданному, приидоша и Ему последоваша на источники вод животныя.

Како не дивимся, зряще тя, священне Митрофане, от младых ногтей проповедником Православия в подвории Бейгуань приседяща и от их устен истинами веры Христовы, аки губа, водою животочною, напояема; послежде, еще юну тебе сущу, братий твоих оными дюбомудренне просвещающа; по сем венец достоин трудов твоих - сан пресвитера от рук Апостола Японии Николая славного приявша и, по стопам его шествуя, служение апостольское доблестно совершивша, емуже и венец мученический совокупи!

Чада моя возлюбленная, вопияше священноучитель Митрофан, се, время испытания наста, никтоже от вас да убоится смерти поносныя, поминающе, како пятьнадесять лет образ милосердия, нестяжания и страннолюбия в житии моем вам являя, поучах вы Господеви работати, скорби и обиды от ближних терпети, наипаче же веру святую аки дар небесный даже до крови хранити.

О мученицы Христовы купонравнии, коль светла страдания ваша, за веру православную подъятыя! Подвиг высоких и славных во смирении сердечнем не искали есте, николиже помышляюще древним мучеником великим уподобитися, но токмо веры Христовы отмещися отреклися есте и сию яко щит противу лица гонителей твердо держали есте и тако, живот свой за Христа положивше, радуюся прехвальным оным страстотерпцем равночестными явилися есте.

Слава, глас 8:

Днесь собор святых мученик, священнотаинником Митрофаном приводимый, духовную трапезу мучениколюбцем предлагает, верою православною сияя аки звезды небесныя, никакоже Солнца Правды Христа отлучаяся, терпеливо поношения, оклеветания, мучения и смерть от рук ихетуань приемлет, радуяся радостию небесною.

И ныне, Богородичен глас той же.

Вход. Прокимен дне. Паремии святым: Из службы Сщмч. Исидору (янв.,8), пророчества Исаиина, глава 43, Премудрости Соломони, глава 3, премудрости Соломони, гл. 5, 6.

На литии стихира храма. Посем: стихиры, глас 5.

Приидите, вернии, воспоим священного Митрофана, единоревнительный лик страдалец Христу с собою приведша, кумиром не поклоньшихся и за веру святую обиды, безчестия и поношения, муки и смерть претерпевших.

Приидете, возславим дивный соном мужей и жен, старцев и стариц, отроков и отроковиц, богомудрому Митрофану, аки овцы, глас пастыря добраго знающия, на страдания последовавших и тако узкими враты и тесным путем в живот вечный вшедших.

Слава, глас 1:

Светлою любовию ко Христу пламенеюще, веры божественныя не отвергостеся и кумиром не поклонистеся, святии мученицы два сте два десят и два с пастырем вашим священнотаинником Митрофаном, и, о Христе укрепляеми, мучителей суровство низложисте. Сего ради венцы победы улучивше, Творцу всяческих молитеся, да спасет души наша.

И ныне, глас той же, Богородичен воскресен от стиховных.

На стиховне стихиры глас 2-й, подобен Доме Ефрафов:

Христа возлюбльше, во след мученик древних потекли есте, священнострадальче Митрофане с дружиною твоею.

Стих: Воззваша праведнии, и Господь услыша их.

Звезды, на Востоке воссиявшия, восхвалим, лик страдальцев добропобедных, светом Православия Китай осиявших.

Богопросвещенный Исаия во тьме веков пророчески вопиет: Се сии издалеча приидут от земли Синим.

Слава, глас 4-й:

Мучеников воинство Христу, святче Митрофане, привел еси, не крепостию ратною и оружии изощренными гордящияся, но токмо немощию своею, Христом укрепляеми, сладце похваляющияся. Се бо страдалец два сте двадесят и два, дивным отроком, сыном твоим Иоанном, предводимыми, егоже от главы до ног ранами злодеи уязвиша, Небесных селений достигоша, идеже древа животного наслаждаются, досточуднии.

И ныне, глас той же.

Тропарь, глас 4-й.

Мученицы Твои, Господи, два сте двадесят и два, в царствии Китайстем просиявшии, веру Христову яко щит держаще и кумиром не поклоньшеся, от единополеменных обезумевших муки и смерть прияша, усты отрока страстотерпца воспевающе: болезни за Христа ни во что же вменяем, за жизнь временную жизнь вечную улучити желающе.

НА УТРЕНИ

Седален по 1-м стихословии, глас 2-й.

Подворие Бейгуань во граде Пекине почтим, процветшее честныя цветы, Христовы бисеры, мученик два сте двадесят и два, яже слуг антихристовых ихетуань посрамиша, темже и венцы прияша, доблемудреннии.

Слава, и ныне, глас тойже:

Дивная и скорая Помощнице всем христианом, буди нам покров и заступление в скорбех и радостех земнаго жития, наставляющи ны присно на путь покаяния, наипаче же умоли Сына Твоего и Бога нашего, да праведных части явит ны причастники.

По 2-м стихословии седален, глас 2-й.

Страстотерпцы Христовы, во граде Пекине добропобедне пострадавшии, камением побиеннии, огнем сожженнии, во кладезь вверженнии, мечи усеченнии, Царство Небесное в наследие приимше, молитеся ко Господу, да спасет души наша.

Слава, и ныне, глас тойже:

Мати Всенепорочная, новыя христолюбцы во граде Пекине при храме Успения Твоего возрастившая и тыя на подвиги мученическия укрепившая, укрепи и ны, грешныя, на невидимыя и видимыя враги душ наших.

По полиелеи седален, глас 4-й.

Коль дивно Твое, Христе, благоутробие, на рабех Твоих смиренных бывшее, яко и немощнейшия сосуды Твоея благодати - убогия вдовицы и старцы, девы юныя и младенец множество, силою Креста Твоего возмогоша лесть идолобесия попрати и, веру святую неколеблему соблюдше, во след Тебе потекоша, радующеся.

Слава, и ныне, глас тойже:

Дева днесь невидимо предстоит любящим Ю на месте, идеже сияше храм честнаго Успения Ея, сынами антихристовыми сожженный, и благословляет чада Своя духовныя кумиром не поклонитися, за веру Христову мужественне пострадати, радующеся, и венцев небесных в Царствии Сына Ея сподобитися.

По 50-м псалме стихира, глас 6-й:

Се сонм мученик добропобедных, пастырю богомудрому Митрофану последующих, во врата Царствия Небеснаго течет, ликующе, мы же сим любовию возопиим: о воини Христови всеблаженнии, молитеся пастыреначальнику, да спасет души наша.

Канон молебный ко Богородице во Октоихе, глас 8-й, на 6, и мучеником глас 2-й, на 8.

Песнь 1.

Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския, яко прославися.

Припев: Святии мученицы Китайстии, молите Бога о нас.

В песнех духовных воспоим с любовию мученик два сте двадесят и два, яже изнесе царство Китай древнее, ихже воспиташа пастырие миссии Российстей и правнуцы сынов Церкви Русския, в двухсотлетнем пленении веру православную соблюдшия.

Радуйся, человече Божий Митрофане Цзи, первый из братий твоих в сане священства воссиявый! Перси твоя, от слуг антихристовых аки сот пчелиный ископанныя, мед сладости страданий за Христа нам искапаху. Темже воспеваеши, священномучениче: поим Господеви, славно бо прославися.

Сияет яко звезда на небеси жена твоя Татиана, во дни живота своего жен светом Евангелия просвещавшая и сих ко святей купели уготовлявшая; сия яви нам образ страданий за Христа, яко премнозе мучима, по стогнам влекома, обаче веры православныя не отрекшися, во главу усечена бе.

Кий язык восхвалит отрока Иоанна, сына ваю, емуже мучители плещи разсекоша, нос, ушеса и пальцы ног отрубиша, сей же, аки в чуждем телеси стражда, яко агнец на заколение Христа ради иде, радуюся.

Богородичен: Упование христианом, Дева Пренепорочная, Сына Твоего и Бога моли со мученики о воспевающих Тя.

Песнь 3.

Ирмос: Лук сокрушися сильных державою Твоею, Христе, и силою немощствующии препоясашася.

Финикс благоплодныйпод финиксом во дворе дома Божия аки плод зрелый Господеви принеслся еси, праведниче иерее Митрофане, сего ради ныне, ликовствуя, вопиеши: утвердися сердце мое во Господе, вознесеся рог мой о Бозе моем.

Павле Ван премудрый, Апостолу язык, егоже имя носил еси, в проповеди слова подражавый, ты, сан иерея по малых днех прияти имевый, не Жертву Безкровную, но себе самого в жертву Богу принесл еси; се бо, колена приклонь, моляся, руце крестообразно сложив, во главу усечен был еси.

Жена Павлова Сарро, мати его Екатерино, чада Иоанне и Александро, венцы небесныя улучисте, доблественне сему воину Христову спострадавше.

Иоакиме юный, сродниче Павлов, ихетуанями у стен града убиенный, ты первомученик христианом во дни скорби сея был еси.

Богородичен: Марие Преблагая, Ейже душу оружие пройде, укрепи ны, слабыя и боязливыя, егда приидет час огненного испытания веры нашея.

Седален, глас 8-й.

В пустыне язычества сад Боговедения процвете, подворие Бейгуань православное, цветы красныя - мученик два сте двадесят и два Христу принесшее, ихже кровми напившеся земля добрая плод добр израсти - новыя люди, святым крещением просветившиеся.

Слава, и ныне, глас тойже:

В пустыне горы Синайския купина неопально процвете, Приснодеву, неопально огнь Божества приемшую, прообразующи, Юже мы любовию и благодарением воспеваем, веселящеся.

Песнь 4.

Ирмос: Услышах, Господи, славное Твое смотрение и прославих, Человеколюбче, непобедимую Твою силу.

Господь Бог мой - сила моя, тако утешал еси, отче Митрофане, овцы твоя духовныя, вкруг тебя в дому твоем в трепете и смятении, яко птенцы под криле кокоша, собравшияся.

Воспоим Иннокентия Фань, иже семи первым диаконам подобяся, попечение о телесных нуждах братий своих с любовию и тщанием исполняще. Темже и Господь тело его, во кладязи камением от безумных побиенное, нетлением прослави.

Спрославим сему и жену его Елену, еже в кумирню приведенная, идолам кланятися воспротивися. За сие многообразные муки от ихетуань претерпевши, душу свою чистую Богу предала есть.

Кую песнь принесем добле воспитанным чадом Иннокентия и Елены - Евмению, Софии и Надежде, имже руце зверонравнии отсекоша и посем телеса их во кладязь ввергоша, идеже они по мнозе времени нетленне обретошася?

Богородичен: Радуйся, обрадованная, радуйся, Всемилостивая, всем в тяжких скорбех Тебе молящимся небесное утешение подавающая.

Песнь 5.

Ирмос: Света Подателю и веков Творче, Господи, во свете Твоих повелений настави нас: разве бо Тебе иного бога не знаем.

От нощи скорбей лютых и болезней неисцельных к Свету невечернему утреннюет дух твой, священномучениче Митрофане.

Да почтится Марие юная, яже, жениху ея Исаии за веру Христову убиенну, притече в дом иереов и рече: у церкве Персвятыя Богородицы духовно рождена есмь, здесь и умру. Темже по мале времени от рук злодеев смерть бестрепетно прият.

Небомудренную Ию Вэнь восхвалим, наставницу школы дев и путеводительницу приходящих ко Христу. Сия двакраты смертныя муки от жестоковыйных претерпе: исперва бо, ножи изсечена бывши, аки мертва землею мало прикровена бе; послежде, стенаниям ея услышанным, паки взята бе и тако венцем мученичества, радующися, увенчана бе.

Мироне Жуй и Марие, в трудех и нищете чада ваша - Марфу, Анастасию, Евдокию, Иннокентия, Савву, Нила, Марию и Елену воспитавшии в страсе Божии, добре приуготовиста сих для Царствия Небеснаго, его же и улучиша, славнии, вкупе с вами за Христа убиенныя.

Богородичен: Преблагословенная Богородице, многи скорби в земней жизни Твоей претерпевшая, помози нам крест земнаго жития в терпении, благодарении и радовании до конца понести.

Песнь 6.

Ирмос: Глас глагол молебных от болезненныя, Владыко, души услышав, от лютых мя избави: Един бо еси нашего спасения виновен.

Из славного моря многомятежного жития сего в вечный пренебесный покой, яко от кита Иона, вшел еси, священнотаинниче отче Митрофане.

Радуйся, Евфимие Пань, от каменносердых камением побиенный. Радуйтеся, Акилино Шуан, Анно Чан, Павле Шуан со чады, в дому своем сожженнии. Радуйтеся, Ирино Фу со чады Анной, Афанасией, Евпрасией Прохором и Марией, за врата града отведенныя и тамо, от Христа не отрекшиеся, убиенныя.

Радуйся, Ирино Гуй Жуй-ши, сердцем твоим кротким Иисуса кроткого возлюбившая и службе церковней на всяк день прилежавшая, ихетуанем, рабов Божиих ищущим, не таясь рекшая: христиане есмы.

Радуйся, вдовица Капитолино Хуай, мрачную нощь отречения от Христа прешедшая и светлым утром покаяния, посем же подвигом мученичества грех свой омывшая.

Богородичен: Владычице, Владычице, зриши немощь нашу и расслабление духовное, настави ны на всяк час бдети и Сыну Твоему молитвы сердечныя возносити, да николиже отступим от Него.

Кондак, глас 2-й.

Яко сокровище многоценное, троелетне в земли сокровенное, обретошася мощи ваша, священнотаинниче Митрофане и овцы твоих учений, во граде Пекине просиявшия, благодать неоскудную подающе душам нашим. Сего ради с радостию и любовию воззовем: молитвами страстотерпец, Христе Боже, помилуй нас.

Икос:

Подвигом и болезнем вашим дивящеся, достоблаженнии страстотерпцы Китайстии, в веселии сердеченм вопием вам:

Радуйтеся, Христа, многоценный бисер, в земли язычестей обретшии;

Радуйтеся, ничтоже от земных сокровищ ему предпочетшии;

Радуйтеся, добре Ему в подвории православнем Бейгуань поработавшии;

Радуйтеся, в час огненного испытания от Него не отступльшии;

Радуйтеся, за Него огнем сожженнии, камением побиеннии, мечем усеченнии;

Радуйтеся, вся сия радостию и веселием претерпевшии;

Радуйтеся, сего ради нас взывати ко Господу подвизающии:

Молитвами страстотерпец, Христе Боже, помилуй нас.

Песнь 7.

Ирмос: Образу златому, на поле Деире служима, трие Твои отроцы небрегоша безбожнаго веления посреди же огня ввержени, орошаемы, пояху: Благословен еси, Боже отец наших.

Храм Божий и строения церковная от мерзких идолопоклонник сожженныя видев, многия скорби исполнился, страдальче отче Митрофане; обаче, в храм пренебесный вшед, воспел еси: Благословен еси, Боже отец наших.

Афанасий А, слячен от юности, коленопреклоненне ходивый, низок телом, но высок душею бе; тем_же, наставшу часу испытаний, жену свою Варвару и триех чад увещаша мук за Христа не устрашитися, сего ради и взывает: Благословен еси, Боже отец наших.

Андрей Чжу, во единодесятый час жития своего в виноград Христов пришедый, делания своего, жестокосердым приближшимся, не остави и тако, на месте трудов своих, во славу Церкве подъятых, убиенный, со всеми от перваго часа потрудившимися воспевает: Благословен еси, Боже отец наших.

Евфимий Ин безстрашный, веру Христову пред ихетуанем Юйсенем исповедавый и онаго безумие обличивый, за сие мечем пронзенный и камением побиенный, песнь богокрасную воспевает: Благословен еси, Боже отец наших.

Богородичен: Людие, во тьме и сени смертней седящия, Богородицею к Свету невечернему призвал еси и за Тя пострадати сподобил еси, Преблагословенный отцев Бог и препрославленный.

Песнь 8.

Ирмос: В пещь огненную ко отроком еврейским снизшедшаго и пламень в росу преложшаго Бога, пойте дела яко Господа и превозносите во вся веки.

Да почтятся честные страдальцы Афанасий Шуан, Лев Хай, Никифор Хай, Васса, Екатерина и Елена Чжунь, Кирилл Хай, Надежда Чан, Ольга А и инии мнози. Сии вкупе с иереем Митрофаном и прочими мученики воспевают: Господа пойте дела, и превозносите Его во веки.

Многовидне потрудистеся в дому Божии, Клименте Куй, Андрее Чжу, Матфее Хай Цюань, Симеоне Си Лин-а, Иосифе Фу, Алексие Чжан, Капитоне Ин, многовидныя муки за Христа претерпевше, ныне ликуете во цветнице Его, взывающе: благословите вся дела Господня, Господа.

Измлада пении и песньми духовными прославлявшии Господа и Пречистую Матерь Его во храме честнаго успения Ея, Афанасие А, Афанасие Юй, Сергие Чжан, Петре Ли Юнь-ань, Алексие Ин, по славнем страдании вашем песнь новую и светлейшую возносите: Благословите вся дела Господня, Господа.

Правнуцы Албазин доблих, древле в пленение Пекинское приведенных, веру православную соблюдшии и за Христа живот свой положившии, ныне сподобистеся свободу славы чад Божиих улучити, воспевающе: Благословите вся дела Господня, Господа.

Богородичен: Дево Всепетая, во храмех пренепорочнаго Успения Твоего и во всей вселенней славимая, всемощным предстательством Твоим мирную кончину живота нашего нам низпосли.

Песнь 9.

Ирмос: Весь еси желание, весь сладость, Слове Божий, Девы Сыне, Боже богов, Господи, святых Пресвятый, тем Тя вси с Рождшею Тя величаем.

Егоже возлюбили есте, Егоже возжелали есте, Егоже ради кровь свою излияли есте, молите Христа Бога, страстотерпцы, во царствии Китайстем просиявшии, да умножит веру Православную во Отечествии вашем и во вем мире Своем.

Святии мощи доблих страдалец, по триех летех из земли извлеченнии и с честию во гробнице под Храмом Всех Святых Мученик положеннии, облагоухаша благодатию подворие Бейгуань, град Пекин и всю землю Китайскую.

Святый апостоле Боговидче Фомо, святителю отче Николае, благовернии князие Псковстии Всеволоде и Довмонте, святителю Иннокентие, града Иркутска похвало, вашим предстательством православнии, в Китае просиявшии, возмогоша Богу послужити преподобием и правдою во вся дни живота своего.

Богродичен: Мати Божия Пречистая, всю Сибирь и землю Китайскую иконою Твоею Албазинскою ограждающая, ейже празднование Промыслом Божиим в день святых мученик Севастийских уставлено, Ты еси мучеников крепость и веселие.

Светилен, глас 1-й.

Звезды светлыя, на Востоце возсиявшия и всю землю лучами своими просветившия, мученицы Христовы два сте двадесят и два, вашими молитвами мрак греховный от душ наших отжените и веселие негиблющее нам, в бурех скорбей сущим, у Господа испросите.

Слава, и ныне:

Яже Свет невечерний рождшая, Присноблаженная и Пренепорочная Дево, светом любве Твоея Матерния хладныя сердца наша согрей и сподоби ны утешения и радости о Господе.

На хвалитех стихиры, глас 4-й.

Радуйся, Церкве Божия, украшаемая собором мученик Христовых, священным Митрофаном предводимых, землю Китайскую кровьми своими освятивших, град Пекин аки вторый Рим явивших, подворие Бейгуань Колизею древнему уподобльших и молящихся присно о чтущих святую память их.

Богосиянныя вы звезды мысленное показа Солнце, небо восточное светом веры Божественныя озарившия и во вся концы земныя лучи подвигов ваших испустившыя, святии мученицы два сте двадесят и два, молитеся за ны ко Господу, да укрепит теплохладную веру нашу.

Яко фимиам благовонен принеслися есте, святии, Подвигоположнику вашему Христу Богу. Огненное запаление, каменное побиение и мечное усечение претерпевше, несумненною надеждою на небесное воздаяние утешаеми, молитеся за ны ко Господу, да оживит слабую надежду нашу.

Любовию ко Господу укрепляеми, противоборцев поправши силу и мучения возсиявше светлостию, небесная селения наследовасте, идеже наслаждаетеся древа жизни. Темже молите, досточуднии, Владыку всех, да воспламенит любовию к Богу и ближнему сердца наша.

Слава, глас 6-й.

Что сей глас радования и веселия? Что пение и лики? Что собор православных на подвории Бейгуань, по триех летех страданий доблих мученик Христовых? Се бо славный архиерей, пастыри и верных множество приидоша возславити мощи дивных страдалец двою стех двадесяти и двою, ихже с честию положиша во гробнице под храмом Всех Святых Мученик, на месте страданий их созданнем. Мы же им согластно воспоим: о святии страстотерпцы, Троице Святей помолитеся, да спасет души наша.

И ныне, по гласу Славы, Богородичен от меньших.

Великое славословие, Ектении и отпуст.

НА ЛИТУРГИИ

Блаженны от канона, песнь 3-я и 6-я.

Прокимен, глас 4-й:

Святым, иже суть на земли Его, удиви Господь вся хотения Своя в них.

Стих: Предзрех Господа пред мною выну, да не подвижуся.

Апостол Рим., зач. 99. Евангелие от Луки, зач. 67.