Час первый

Прииди́те, поклони́мся Цареви нашему Богу.

Прииди́те, поклони́мся и припадéм Христу, Царéви нашему Богу.

Прииди́те, поклони́мся и припадéм Самому́ Христу, Цареви и Богу нашему.

Псалом 5

Глагóлы мóя внуши́, Гóсподи, разумéй звáние мóе. Вонми́ глáсу молéния моегó, Царю́ мой и Бóже мой, я́ко к Тебé по молю́ся, Господи. Зáутра услы́ши глас мой, зау́тра предстáну Ти, и у́зриши мя. Яко Бог, не хотя́й беззакóния, Ты еси́; не присели́тся к Тебé лукáвнуяй, нижé пребу́дут беззакóнницы пред очи́ма Твóима. Возненави́дел еси́ вся дéлающия беззакóние, погуб ши вся глагóлющия лжу; му́жа кровéй и льсти́ва гнушáется Госпóдь. Аз же мнóжеством ми́лости Твоéя вни́ду в дом Твой, поклоню́ся ко хрáму святóму Твоему́ в стрáсе Твóем. Гóсподи, настáви мя прáвдою Твóею, враг мóих рáди испрáви пред Тобóю путь мой. Яко несть во устéх их и́стины, сéрдце их су́етно, гроб отвéрст гортáнь их, язы́ки свóими льщáху. Суди́ им, Бóже, да отпаду́т от мы́слей свои́х; по мнóжеству нечéстия их изри́ни я́, я́ко преогорчи́ша Тя, Гóсподи. И да возвеселя́тся вси уповáющии на Тя, во век возрáдуются, и всели́шися в них; и похвáлятся о Тебé лю́бящии и́мя Твоé. Яко Ты благослови́ши прáведника, Гóсподи, я́ко ору́жием благоволéния венчáл еси́ нас.

Псалом 89

Господи, прибе́жище был еси́ нам в род и род. Пре́жде даже гора́м не бы́ти и созда́тися земли́ и вселе́нней, и от века и до века Ты еси́. Не отврати́ челове́ка во смире́ние, и рекл еси́: обрати́теся, сы́нове челове́честии. Яко ты́сяща лет пред очи́ма Твои́ма, Господи, яко день вчера́шний, и́же мимои́де, и стра́жа нощна́я. Уничиже́ния их ле́та бу́дут. Утро яко трава́ мимои́дет, у́тро процвете́т и пре́йдет: на ве́чер отпаде́т, ожесте́ет и и́зсхнет. Яко исчезо́хом гне́вом Твоим, и я́ростию Тво́ею смути́хомся. Положи́л еси́ беззако́ния на́ша пред Тобо́ю: век наш в просвеще́ние лица́ Твоего. Яко вси дни́е наши оскуде́ша, и гне́вом Твоим исчезо́хом, ле́та на́ша яко паучи́на поуча́хуся. Дни́е лет наших, в ни́хже се́дмьдесят лет, аще же в си́лах, о́смьдесят лет, и мно́жае их труд и болезнь: яко прии́де кро́тость на ны, и нака́жемся. Кто весть держа́ву гне́ва Твоего́, и от стра́ха Твоего я́рость Твою исчести́? Десни́цу Твою та́ко скажи́ ми, и окова́нныя се́рдцем в му́дрости. Обрати́ся, Господи, доко́ле? И умоле́н бу́ди на рабы́ Твоя. Испо́лнихомся зау́тра ми́лости Твоея, Господи, и возра́довахомся, и возвесели́хомся, во вся дни нашя возвесели́хомся, за дни, в ня́же смири́л ны еси́, ле́та, в ня́же ви́дехом зла́я. И при́зри на рабы́ Твоя, и на дела́ Твоя, и наста́ви сы́ны их. И бу́ди све́тлость Господа Бога на́шего на нас, и дела́ рук на́ших испра́ви на нас, и де́ло рук на́ших испра́ви.

Псалом 100

Ми́лость и суд воспою́ Тебе, Господи. Пою́ и разуме́ю в пути́ непоро́чне, когда́ прии́деши ко мне? Прехожда́х в незло́бии се́рдца моего посреде́ до́му моего. Не предлага́х пред очи́ма мои́ма вещь законопресту́пную: творя́щыя преступле́ние возненави́дех. Не прильпе́ мне се́рдце стропти́во, уклоня́ющагося от мене лука́ваго не позна́х. Оклевета́ющаго тай и́скренняго своего́, сего́ изгоня́х: го́рдым о́ком, и несы́тым се́рдцем, с сим не ядя́х. Очи мои на ве́рныя земли́, посажда́ти я́ со мною: ходя́й по пути́ непоро́чну, сей ми служа́ше. Не живя́ше посреде́ до́му моего творяй горды́ню, глаго́ляй непра́ведная, не исправля́ше пред очи́ма мои́ма. Во у́трия избива́х вся гре́шныя земли́, е́же потреби́ти от гра́да Господня вся де́лающыя беззако́ние.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилуиа, аллилуиа, аллилуиа, слава Тебе, Боже. (Трижды)

Господи, помилуй. (Трижды)

Слава: Тропарь дня.

И ныне: Богородичен:

Что Тя наречéм, о Благодáтная? Нéбо, я́ко возсия́ла еси́ Сóлнце прáвды; рай, я́ко прозяблá еси́ цвет нетлéния; Дéву, я́ко пребылá еси́ нетлéнна; чи́стую Мáтерь, я́ко имéла еси́ на святы́х Твóих объя́тиях Сы́на, всех Бóга, Тогó моли́ спасти́ся душáм нáшим.

(Если Великий пост, — тропарь, глас 6:

Зау́тра услыши глас мой, Царю́ мой и Боже мой.

Стих 1: Глаголы моя внуши́, Господи, разумéй звание мое.

Стих 2: Яко к Тебе помолюся, Господи.

Слава, и ныне: Богородичен: Что Тя наречем...)

Стопы́ моя направи по словеси́ Твоему, и да не обладает мною всякое беззаконие. Избави мя от клеветы́ человеческия, и сохраню заповеди Твоя. Лицé Твое просвети на раба Твоего, и научи мя оправданием Твоим.

Да испóлнятся устá моя хвалéния Твоего, Господи, яко да воспóю славу Твою, весь день великолéпие Твое.

Трисвятое. И по Отче наш: Кондак праздника. (Если кондака нет, или Великий пост, читаем Богородичен:

В понедельник, вторник и четверг:

Преславную Божию Матерь, и святых Ангел святéйшую, немóлчно воспоéм сердцем и усты́, Богородицу си́ю исповéдающе, яко вóистинну рóждшую Бога воплощéнна, и молящуюся непрестанно о душáх наших.

В среду и пятницу:

Скоро предвари́, прежде даже не порабóтимся врагом, ху́лящим Тя и претя́щим нам, Христе Боже наш; погуби́ Крестом Твоим борю́щия нас, да уразумéют, како может православных вера, молитвами Богородицы, еди́не Человеколю́бче.

В субботу:

Яко начáтки естества, Насад телю твáри, вселенная приносит Ти, Господи, богонóсныя мученики. Тех молитвами в мире глубóце Церковь Твою, жительство Твое Богородицею соблюди́, Многоми́лостиве.)

Господи, помилуй. (40)

Иже на всякое время и на всякий час, на небеси́ и на земли́ покланя́емый и слáвимый, Христе Боже, долготерпели́ве, многоми́лостиве, многоблагоутрóбне, Иже праведныя любя́й и грешныя ми́луяй, Иже вся зовы́й ко спасению обещания ради будущих благ, Сам, Господи, приими́ и наша в час сей молитвы, и испрáви живот наш к зáповедем Твоим, ду́ши нáша освяти́, телесá очисти, помышления исправи, мысли очисти, и избави нас от всякия скорби, зол и болезней, огради нас святы́ми Твоими Ангелы, да ополчéнием их соблюдáеми и наставля́еми, достигнем в соединение веры и в разум непристу́пныя Твоéя славы, яко благословéн еси́ во веки веков, аминь.

Господи, помилуй. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честнéйшую Херуви́м и слáвнейшую без сравнения Серафим, без истлéния Бога Слова рóждшую, сущую Богородицу Тя величáем.

Именем Госпóдним благослови, отче.

Иерей: Боже, ущедри ны и благослови ны, просвети лице Твое на ны и помилуй ны.

(Если Великий пост — молитва св. Ефрема Сирина с тремя великими поклонами:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон)

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон)

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон)

Таже малых 12, глаголюще на кийждо поклон: Бо́же, очи́сти мя гре́шнаго. И паки последи молитву всю:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь.

И поклон един великий.)

Трисвятое. И по Отче наш: Господи, помилуй. (12)

Иерей: Христé, Свéте истинный, просвещаяй и освящáяй всякаго человека, гряду́щаго в мир, да знáменается на нас свет лица Твоего, да в нем у́зрим свет непристу́пный; и исправи стопы́ наша к деланию зáповедей Твоих, молитвами Пречи́стыя Твоея́ Мáтере и всех Твоих святых. Аминь.

Хор: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Господи, помилуй. (Трижды) Благослови.

Иерей произносит отпуст.

15 января 2018 г.

Православие.Ru рассчитывает на Вашу помощь!
Храм Новомученников Церкви Русской. Внести лепту

Подпишитесь на рассылку Православие.Ru

Рассылка выходит два раза в неделю:

  • В воскресенье — православный календарь на предстоящую неделю.
  • Новые книги издательства Сретенского монастыря.
  • Специальная рассылка к большим праздникам.
×